Бөгелмә авазы

“Молокомер”га сыймый

Дамир Асылов газета битләрендә нефтьчеләр турында күп яза. Шуларны укыганда үземнең дә баштан үткән бер вакыйга искә төште.

…"Актүбәнефть"тә эшләгән чор. Зур, күләмле конференция була диделәр. Өлкән оператор буларак, миңа да барырга куштылар. Конференция башланып китте. Кунаклар хәйран күп җыелган. Профсоюзларның өлкә комитетыннан да бар. Президиум нәчәлникләр белән тулы.

Нефть үлчәү приборлары турында сөйләшү башлангач, сүз кызып китте. Ул вакытта хәзерге кебек ГЗУлар (русчалап әйткәндә, групповая замерная установка) юк әле. Башлыклар приборлар нефтьне дөрес үлчәми дип зарланалар. Шунда Азнакайның беренче секретаре Әнвәр Баһаветдинов сүз алды (безнең якларда бераз эшләгәч, аны ТАССРның Верховный Советы рәисе итеп алдылар). "Оят түгелме сезгә? Нефть үлчи алмыйсыз. Әнә колхоз-совхозлар атна саен "контрольный дойка" ясыйлар", - ди бу.

Шунда мин түзмәдем: "Әнвәр Бәдертдинович, безнең суткага 500 тонна нефть бирүче скважиналар бар, ул хәтле нефть молокомерга сыймый бит", - дидем.
Озакламый тәнәфес игълан иттеләр. Идарә начальнигы Яруллин чакырып алды. Ул мине бик яхшы белә иде, 1974 елда, җитәкчеләргә бирмичә, миңа "Москвич" биргән иде. Машина бирде дигәч тә, бушлай дип уйлый күрмәгез тагын. Ул чакта машиналарны идарәләргә чират буенча бүлеп бирделәр. Яруллин әйтә миңа: "Бик дөрес әйттең дә бит, дәшмәскә генә иде сиңа, барыбер Баһаветдинов белми бит аны". Күз кырыем белән генә карыйм, читтәрәк цех нәчәлникләре, мастерлар кычкырып көлешәләр, Яруллин моның кирәген бирә инде дип уйлаганнардыр, күрәсең. Халык белмичә әйтми инде, туры әйткән туганына ярамаган дип. Элек тә шулай иде, хәзер дә.
Әхмәтҗан ХӘЙДӘРОВ,
хезмәт ветераны.
Кодаш авылы.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: