Бөгелмә авазы

Баладан әнигә 28 наказ

Безнең Ислам дине галимнәре "Баланың тәрбиясе ир үзенә хатын сайлаганда ук башлана", дигән фикердә.


Аның ата-бабалары кем булган - моны белү дә комачау итми. Бу аңлашыла да, чөнки балага 75 % тәрбияне ана кеше бирә, калганын җәмгыять, балалар бакчасы, мәктәп бирә. Картаймыш көндә ата-аналар балалары кулына каласын уйласа, бүгенге көндә яшь ханымнар бер кулларына тәмәке тотып икенче кулына баласын җитәкләп йөрмәс иде. Дөрес тәрбия алган бала гына киләчәктә ата-анасына рәхмәтле була беләчәк. Игътибарыгызга кечкенә баланың әнисенә наказларын тәкьдим итәбез. Бу теләкләр сезгә балаларыгыз белән уртак тел табарга ярдәм итәр дигән өметтә калабыз.
Әни:
1. Мине күп иркәләвең белән бозма, узындырма.
2. Мине озак вакытка бер үземне ташлама, ялгыз калдырма.
3. Минем белән җитди бул, әгәр эшлим дисәң, эшлә - эшләмим дисәң, эшләмә.
4. Мине яман гадәтләр өйрәнүдән тый.
5. Күршеләр, туганнар алдында мине беркайчан да әрләмә. Кеше күрмәгәндә генә әрлә, чөнки мин оялам.
6. Минем эшләгән хаталарымны гафу ителмәгәнен күрсәтмә, гафу итә бел (4-5 көн сөйләшмичә йөрмә).
7. Мине гел кычкырып әрләмә, чөнки мин сине тыңламый башлаячакмын, миңа ул гадәти хәл булып калачак.
8. Әгәр мин синнән берәр нәрсә сорасам, җавап бир, минем белән дус бул. Беркайчан да ялгышмыйм дип әйтмә, ялгышсаң, мин сиңа ышанмый башлыйм.
9. Әгәр мин хата кылсам, гафу ит мине. Гафу ит дип сорасам, мине гафу итә бел, син дә шулай ялгыша идең бит.
10. Мәхәббәт - ул сүз генә түгел, ә гамәл дә. Син миңа күбрәк мәхәббәт күрсәтсәң, мин сине бик яратачамын. Миңа җылылык бир, мин дә сиңа җылылык күрсәтермен.
11. Кеше алдында оят булмасын өчен миңа ашау әдәбен өйрәт.
12. Мине пөхтә итеп киендер, иске киемнәрдән йөртмә.
13. Миңа олыларны, күршеләрне хөрмәт итәргә өйрәт.
14. Мине матур сүзләргә, елмаерга өйрәт.
15. Миңа үземнең хаталарымны танырга һәм "Мин ялгыштым" дип әйтергә өйрәт.
16. Әти, әни, сез нинди - мин дә шундый. Үзегездә булмаган сыйфатларны миннән таләп итмәгез.
17. Миңа мәхәббәтне, йомшаклыкны, мәрхәмәтлелекне өйрәт, саранлыктан тый.
18. Миңа намаз өйрәт. Аллаһыны танырга, Пәйгамбәрне с.г.в. яратырга өйрәт. Савап эшләргә теләк өйрәт. Миңа хәләл ризык кына ашат.
19. Әгәр мин яхшылык эшләсәм, мине рухи яктан макта.
20. Мин ашамасам, мине төрле нәрсәләр белән кызыктырып, алдап ашатма.
21. Миңа рөхсәт сорау әдәпләрен өйрәт.
22. Мине файдалы эшләр белән мәшгуль ит. Вакытымны исрафка үткәрмәскә өйрәт.
23. Миңа эшли алмаслык эшләр йөкләмә һәм аларның үтәлүен миннән таләп итмә - мин бит әле кечкенә.
24. Миңа якын бул, теләкләремә җитди кара, фикерләремне хөрмәт ит.
25. Миңа дус бул, дуслар сайларга өйрәт.
26. Мине караучыга калдырып үзең эшкә китеп барма - синең күңел җылыңны миңа беркем дә алыштыра алмас.
27. Миңа әтине яманлап сөйләмә. Мин аны да яратам.
28. Мине ничек тәрбияләү хакында әти белән алдан сөйләшеп куегыз. Минем каршыда минем тәрбиям турында яисә башка хакта әрләшмәгез.
Мөхтәрәм укучылар, психологлар да, дин белгечләре дә бу теләкләрне дәвам итә алыр иде. Ләкин баланың анасына төп наказлары әнә шундый. Бу киңәшләр нарасыйларыгыз белән аңлашылмаучанлыклар килеп чыгудан сакласын, балаларыгыз динебезгә, җәмгыятькә файдалы кешеләр булып үсеп җитсен, ә сезгә терәк һәм догачы булып калсыннар иде.

 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: