Берләшкән Милләтләр Оешмасы карары белән ноябрьнең өченче якшәмбесе бөтен дөньяда юл һәлакәтләрендә корбан булганнарны искә алу көне буларак билгеләп үтелә. Әлеге уңайдан күңелсез статистикага игътибарны җәлеп итеп, арытаба юлга чыккан кешеләрнең иминлеген саклау, гомерләрне коткарып калу максаты белән эшләнә бу.
Руслан ЙОСЫПОВ,
хакимиятнең матбугат хезмәткәре.
Автор фотолары.
Бөгелмәнең Техника йорты каршындагы мәйданында да ул көнне "Юлларда иминлек булсын" ("Мир на дорогах") дип исемләнгән чара үтте. Анда яшьләр, җәмәгать оешмалары һәм күмәк мәгълүмат чаралары вәкилләре катнашты.
Кереш сүз белән очрашуны Россия Эчке эшләр министрлыгының Бөгелмә ЮХИДИ бүлеге инспекторы, полиция өлкән лейтенанты Гөлнара Гыйбадуллина ачып җибәрде. Аннары имам-хатыйб Наил хәзрәт Йосыпов белән Бөгелмә храмы рухание Георгий атакай чыгыш ясадылар.
Чарада катнашучылар юл-транспорт вакыйгаларында гомерләре өзелгән кешеләрне бер минут тынлыкта искә алгач, ак һәм кара төстәге автомашиналар М. Җәлил урамы буйлап уздылар. "Курс-М" студентлар клубы вәкилләре һәм яшь гвардиячеләр юлларда иминлекне сак-ларга өндәгән буклетлар тараттылар.
Белешмә. Бөтен дөнья күләмендә исәпләгәндә, юл һәлакәтләрендә һәр көнне 3 меңнән артык кешенең гомере өзелә, 100 меңгә якын кеше имгәнә, тән җәрәхәтләре ала. Россия юлларында исә ел саен 20 меңнән артык кеше һәлак була. Татарстанда соңгы 10 айда 4 меңнән артык юл-транспорт вакыйгасы теркәлеп, анда 584 кеше үлгән, 5 меңнән артык кеше имгәнгән. Бөгелмә муниципаль районы территориясендәге юлларда, ел башыннан алып исәпләгәндә, 110 вакыйгада 15 кеше якты дөньядан китеп барган, 138 кеше зыян күргән.
Иң мөһим һәм кызыклы язмаларны Татмедиа Telegram-каналында укыгыз
