Бөгелмә авазы

Халыкка файдага

1 февраль көнне Бөгелмәгә эшлекле визит белән ТР төзелеш, архитектура һәм торак-коммуналь хуҗалыгы министры урынбасары Равил Каюм улы Кәримов һәм алтынчы чакырылыш РФ Федераль Җыены Дәүләт Думасына сайланган депутат, "Түбән Кама шин" заводы генераль директоры Радик Сабит улы Ильясов килде.

Әлфия МОСТАФИНА.
Л.Вилданова фотосы.

Хакимият бинасында алар муниципалитетның төзелеш комплексы һәм то­­­рак-коммуналь хуҗа­лыгы хезмәт коллективлары җитәкче-белгечләре белән очраштылар. Муниципаль район башлыгы, шәһәр мэры Илдус Касыймов, кунаклар белән таныштырганнан соң, беренче сүзне министр урын­­­басарына бирде.

Р.Кәримов халыкка ком­­муналь хезмәт күрсә­­түчеләр алдында "Рес­­пуб­­лика торак-коммуналь хуҗалыгы комплек­сының 2011 елдагы эшчәнлеге йомгаклары һәм 2012 елга бурычлар" дигән темага доклад белән чыгыш ясады. Сүз башында ул Бөгелмәгә беренче тапкыр килүен, интернеттан укып белүенчә, Бөгелмәнең борынгы шә­­­­­һәр икәнен ассызык­лап, алып барылган төзелеш эшләренең, бишенче елын эшләүче капиталь ремонт про­граммасының шәһәр йө­зен үзгәртүгә, яңартуга зур өлеш кертүен билгеләп узды. Аннары Р.Кәримов, саннар һәм фактлар китереп, министрлыкның 2011 елдагы эшчәнлегенә кыскача анализ ясады, 2012 елга билгеләнгән бурычларга тукталды.

Узган елда адреслы программа кысаларында 39 муниципаль районда җәмгысе 1024 күп­­фатирлы торак йорт тө­зекләндерелгән (бу 5,8 мил­лион квадрат метр мәйдан дигән сүз). Димәк, 239,8 мең кешенең торак шартлары яхшыртылган булып чыга. Ә программа эшли башлаганнан бирле 4 елда Татарстанда гомуми мәйданы 39,7 мил­­­лион квадрат метр (республикадагы барлык күпфатирлы йортларның 49,8 проценты) булган 9200 йортка капиталь ремонт уздырылган. Моның өчен төрле чыганаклардан 24,7 миллиард сум күләмендә финанс чыгымнары сарыф ителгән.

Чыгыштан күренгән­чә, республика террито­рия­­сендә капремонт "со­­­­­раучы" 6 меңгә якын күп­фатирлы йорт бар икән әле, моның өчен исә 47 миллиард сум акча таләп ителә.

Күпфатирлы йортлар­­га гомумйорт исәп-хи­сап приборлары кую мәсь­әләсе дә - министрлык контролендә. Мәсәлән, 2009-2010 елларда 10852 шундый прибор урнаштырылган булса, узган елда гына да бу сан 7828гә җиткән.

Чыгыш ясаучы торак-ком­муналь хуҗалыгын рефо­р­ма­­­­лаштыруда бу өлкә бел­гечләренең бе­­­­лемен күтәрүнең мө­һим­леген ассызыклап, рес­публика күләмендә 69 уч­реж­­­дениенең ТКХ эшче-бел­гечләренең бе­­­лемен күтәрү белән шөгыльләнүен әйтеп уз­­ды. Аларда бүгенге көнгә бу сферада эшләүче 669 белгеч (шуларның 411е - коммуналь хезмәт күрсәтүче) үз белемен күтәргән инде.

Аннары сүз РФ Дәүләт Думасы депутаты Радик Ильясовка бирелде. Ул Бөгелмә белән күптәннән таныш булуын әйтеп, уз­ган елның көзендә праймериз вакытында үзенә күрсәтелгән ышаныч өчен бөгелмәләргә рәхмәт хис­­­­ләрен җиткерде һәм алда торган Президент сайлауларында да шәһәррайон халкының дөрес юл сайлаячагына тирән ышанычын белдерде.

Депутат бүген халык­ны аеруча борчыган мә­сьәләгә - коммуналь хез­мәтләргә тү­ләүләргә тукталып, бер бик тә гый­брәтле чагыштыру китерде: "Кибетләрдә, мәсәлән, - диде ул, - кассир сездән, өс­тәмә хезмәт өчен дип, артык акча ала алмый бит. Счет-фактуралардагы саннар да халыкка аңлаешлы булырга тиеш". Бик тә дөрес сүзләр бу.

Аннары министр урын­­басары белән депутат очрашуда катнашучы­ларның күпсанлы сорауларына җавап бирделәр.

Киңәшмә соңында шә­­­һәр мэры Илдус Касыймов кунакларга эшлекле сөйләшүдә катнашканнары өчен рәхмәт белдерде.

Төштән соң Бөгелмә муниципаль районы башлыгы Илдус Касыймов РФ Дәүләт Думасы депутаты Радик Ильясов белән бергә үзәк район хастаханәсенең травматология үзәген, бала тудыру йортын, "Энергетик" стадионын һәм "Юность" спорт комплексын карадылар, Восточный поселогында "2012 елга кадәр авылларның социаль үсеше" программасы кысаларында төзелгән су чистарту корылмасын ачуда катнаштылар (рәсемдә).

4,5 миллион сумлык швед җайланмалары белән җиһазландырылган корылма әлегә республикада - бердәнбер.

Реклама
Нравится
Поделиться:
Реклама
Комментарии (0)
Осталось символов: