Урамнан узган идем-2
“Бөгелмә авазы”н даими укучылар хәтерли булыр, моннан берничә ел элек, төгәлрәге 2011 елның октябрь аенда, “Урамнан узган идем...” дигән баш астында мәкаләм дөнья күргән иде.
Анда мин узып барышлый, очраклы рәвештә генә, авылдашыбыз Хатыйп ага Баһаветдиновның игелекле эш башкарган вакытына туры килүем турында язган идем. Зират ихатасы буена тезеп, имән агачлары утыртып булыша иде ул.
Менә быел, әле шушы көннәрдә генә шул тирәдән тагын уздым әле. Махсус бардым бу юлы. Авылдашыбыз куллары белән утыртылган агачлар – барлыгы 42 төп имән гөрләп үсеп утыра бүген.
Саф булып утырган көчле, нык имәннәр, аларның табигый матурлыгы, куәте авылдашларыбызны еллар-гасырлар буе шатландырыр, көч-дәрман биреп торыр әле – “йөзъяшәр имән” дип, юкка гына әйтмиләр бит алар турында.
...Хатыйп ага үзе арабызда юк инде. Бакыйлыкка күчте. Әмма күркәм эше калды. Аның рухы да үзенең шушы хезмәт җимешләренә – шаулап утырган имәннәргә бик сөенәдер.
Фазыл ВӘЛИӘХМӘТ.
Карабаш бистәсе.
Автор фотосы.
Иң мөһим һәм кызыклы язмаларны Татмедиа Telegram-каналында укыгыз
