Кадерен беләләр, саклыйлар
Корбан бәйрәме алдыннан Финляндия татарларының "Yaña Mähallä habärläre" ("Яңа мәхәллә хәбәрләре") журналы бастырып чыгарылган.
Финляндия татарлары имамы, журнал редакторы Рамил Билал сөйләвенчә, "Мәхәллә хәбәрләре" газетасы 1950-1980 елларда басыла. 2004 елда журнал итеп, яңадан әзерләнә башлый.
Журналда татар җәмгыяте тарихына, аның бүгенге эшчәнлегенә, балаларга, туган телгә зур урын бирелә. Рамил Билал журнал яшьләрдә туган телгә мәхәббәт тәрбияләр дип ышана.
Финляндия татарлары телне, динне саклап яши.Анда бүгенге көндә 1000 татар милләт булып оешып яши. Бабалары - чыгышлары буенча Нижгар өлкәсенең Сергач районыннан күчеп килгән сәүдәгәрләр. Күпчелеге Хельсинки, Турку һәм Тампере шәһәрләрендә яши, үз мәчетләре дә бар. Фин татарларының милли яшәешне саклауларының сере шунда - алар татар-мөселман мәхәллә системасы нигезендә яши. Ягъни шәһәр үзәгендә 4 катлы мәхәллә йортлары бар. Аның бер каты мәчет, кибет һәм мәдәни үзәк ролен үти. Татарлар мәхәлләгә теркәлгән. Милли салым (налог) дигән төшенчә яшәп килә. Әлеге акча дини вә милли эшләргә тотыла. Елына берничә мәртәбә татарларның уртак мәҗлесе, милли кичәләр уза, җәен балалар өчен лагерь оештырыла.
Иң мөһим һәм кызыклы язмаларны Татмедиа Telegram-каналында укыгыз
