Бөгелмә авазы

ХӘРБИ ДАН КӨНЕ – КАҺАРМАННАР КӨНЕ

Бөгелмәдә Россиядә Хәрби дан көненә багышланган тантаналы чара үтте.


9 декабрь көнне кадетлар интернат-мәктәбе укучылары 352 нче укчы дивизия хөрмәтенә куелган стела янында мактаулы хәрби хәтер вахтасында тордылар. Тантанада "Единая Россия" сәяси партиясе җирле бүлегенең башкарма комитеты җитәкчесе Әнвәр Әхмәдиев, РФ Кораллы Көчләре подполковнигы Фаил Закиров, мәктәп укучылары чыгыш ясады. Аннары чарада катнашучылар һәлак булганнарны бер минут тынлык белән искә алдылар. Бөек Ватан сугышы ветераны Хәмит Шафиков, "Единая Россия" партиясе башкарма комитетының җирле бүлеге җитәкчесе һәм РФ Кораллы Көчләре вәкиле белән бергәләп, стелага кәрзин тулы чәчәкләр куйды (рәсемдә). Мәктәп укучылары һәм "Яшь гвардия" вәкилләре дә һәйкәл тирәсен кызыл канәферләргә күмделәр. Тантаналы чара 352 нче укчы дивизия музеенда дәвам итте. Бу музей Бөгелмәнең 11 нче урта мәктәбендә урнашкан. Ул узган гасырның 60 - 70 нче елларында сугыш ветераны, география укытучысы Иван Саввич Закреничный тарафыннан оештырылган. Әлеге мәктәптә белем алучы укучылар музей буйлап мавыктыргыч экскурсия уздырдылар, кунакларны фронтларда барган каты сугышлар турында тупланган мәгълүматлар белән таныштырдылар, аерым сугышчыларның фотосурәтләрен күрсәтеп, аларның сугыштагы батырлыклары турында сөйләделәр.
Үсеп килүче яшь буын Ватаныбыз күге һәрчак аяз булсын, кешеләр башкача сугыш афәтләрен күрмәсен дигән изге теләк белән илебезне яклап сугышкан, шулар хакына гомерләрен аямаган каһарманнар турында белеп үсәргә тиеш.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: