Халыкка хезмәттә

Әлфинур ШӘВӘЛИЕВА.

Китапханәнең сугышка кадәрге елларда ук эшләп алган татар бүлеге, авыр елларда аерым бүлек буларак эшчәнлеген туктатса да, милли әдәбиятны пропагандалау, халыкны татарча китаплар, вакытлы матбугат белән даими таныштырып бару эшен даими төстә дәвам иттергән. Ә инде 1995 елның 1 мартында әлеге бүлек рәсми төстә кабат ачылгач, татар әдәбиятын сөючеләр өчен мәйдан тагын да киңәя төшә. Бүгенге көндә биредәге фондта 8 меңнән артык китап санала, 44 төрле газета-журнал килеп тора (республикада гамәлдә булган икетеллелек турындагы закон кысаларында, дәүләт ярдәме нык сизелә). Кызыксынучылар биредә татарча чыга торган матбугат басмаларының барысын да диярлек таба ала. Бүлек җитәкчесе Айсылу Фәрзетдин кызы Нуретдинова әйтүенчә, укучы-әбүнәчеләр саны 2 500дән артып китә.

Бүлек бүген актив эштә. Бердән, китапханә уздыра торган бер генә чарадан да читтә калмыйлар алар. Икенчедән, "Бөгелмә авазы" хезмәткәре Ә. Шәвәлиева билгеләп үткәнчә, галиҗәнап Китап һәм матур әдәбият дигән олуг кодрәт иясен пропагандалау белән генә чикләнмичә, телне һәм милли традицияләрне саклау юнәлешендә дә биниһая эш башкаралар һәм ул эш киңкырлы итеп алып барыла: Казан һәм Әлмәт язучылары белән очрашулар, җирле авторларның иҗатларын күрсәтү һәм күтәрү максатыннан оештырылган кичәләр, электрон аралашулар, укучы балалардан алып, ветераннарга кадәр үз мәнфәгатьләре буенча кунакханәләр (клублар) рәвешендә һ.б. Милли мәдәниятне, йолаларыбызны саклау максаты да эшне төрләндерә: бүлек шәһәребезнең "Ихлас" фольклор ансамбле белән тыгыз хезмәттәшлек итә (ансамбль җитәкчесе Людмила Габдрахманова).

Кыскасы, китапханәнең татар әдәбияты һәм туган як бүлеге шәһәрдәшләребезнең тормышын яктырту, рухиятен баету, күңелен сафландыру һәм, гомумән, халыкка хезмәт юлында иҗтиһат итә.