Эшлекле киңәшмә
26 октябрь көнне хакимият бинасының киңәшмәләр залында октябрь аенда башкарылган эшләргә йомгак ясалды, ноябрь аена планнар каралды. Алар турында Бөгелмә муниципаль районы башлыгы, шәһәр мэры Илдус Касыймов сөйләде. Аннан соң җаваплы затлар үзләре җитәкләгән оешма-предприятиеләрнең агымдагы айдагы эшләре белән таныштырдылар.
Өлкәннәр ункөнлеге кысаларында үткән чаралар турында халыкны социаль яклау идарәсе җитәкчесе сөйләде: "30 меңгә якын лаеклы ялдагылар бу көннәрдә аеруча кадер-хөрмәттә булдылар. Өлкәннәребезне шулай олылау инде матур традициягә әверелде, киләчәктә дә ул эшләр дәвам итәчәк".
Октябрь аенда хокук саклау органнарына 286 граждан мөрәҗәгать иткән, алар буенча оператив рәвештә чаралар кабул ителгән. 16 октябрь көнне Наратлы авылында булган янгында ике баланың гомере өзелгән. 2009 һәм 2010 елда туган балалар әти-әниләренең ваемсызлыгы аркасында якты дөнья белән хушлашканнар. Шулай ук гражданнарның төрле мошенниклар кармагына эләгү очраклары да һәрдаим булып тора икән.
Наркотиклар белән бәйле җинаятьләрнең 15 очрагы теркәлгән. Бигрәк тә урта һөнәри уку йортларындагы студентларның әлеге кырын эшкә тартылуы борчылу тудыра. Наркотик матдәләрнең законсыз әйләнешенә каршы көрәш комиссиясенең чираттагы утырышы әлеге мәсьәләгә багышланачагы ассызыкланды.
Наркотик матдәләр әйләнешен контрольдә тоту федераль хезмәте идарәсенең районара бүлеге начальнигы А.А.Савенконың отставкага китүе турында хәбәр ителде.
Районда ике җирле берәмлектә - Яңа Сумароково һәм Яңа Александровкада балалар бакчасы-мәктәпләрдә җылы юклыгы ачыкланды. Шул ук вакытта Кодаш һәм Таллы Бүләк авыллары мәдәният йортларында да җылы булмаячагы әйтелде.
Шулай ук икътисад, мәгариф, сәламәтлек саклау идарәләре, мәдәният бүлеге һәм башка хезмәтләр җитәкчеләре дә отчет тотты. Бөгелмә шәһәре һәм районы мөхтәсибе Рөстәм хәзрәт Хәйруллин Корбан бәйрәмен үткәрүдә өлеш керткән һәммә кешегә рәхмәтләрен җиткерде.
Иң мөһим һәм кызыклы язмаларны Татмедиа Telegram-каналында укыгыз
