Татарстанда транспорт чараларын урлау очраклары арткан. Шуңа күрә дә ТР Эчке эшләр министрлыгы "Автомобилеңне сакла!" дигән профилактик чаралар комплексы үткәрә.
Гөлнара ГЫЙБАДУЛЛИНА,
ЮХИДИ бүлеге пропаганда инспекторы,
полиция өлкән лейтенанты.
Агымдагы елның 9 аенда Татарстанда транспорт чараларын урлауның 1 мең очрагы теркәлгән (узган елдагыдан 27,2 процентка күбрәк). Җинаятьләрнең 38,4 проценты Казан шәһәренә туры килә. Уртача алганда, тәүлек саен республикада өчәр машина урлана дигән сүз бу. Дәүләт автоинспекциясе хезмәткәрләре шуның 235 очрагын (39,1 процент) ачканнар. Казанда югалган машиналарны табуда юл йөрү кагыйдәләрен бозуларны автомат рәвештә теркәү приборлары нык ярдәм итә: быел 2452 транспорт чарасы "эләккән" булса, шуларның яртысы диярлек (45,2 проценты) нинди дә булса сәбәп белән эзләнә торган машиналар булып чыккан.
Ни кызганыч, автомобильләргә үсмерләр дә еш кызыга, Бөгелмәдә, мәсәлән, шушы вакыт эчендә балигъ булмаганнар тарафыннан машина алып китүләрнең 16 очрагы теркәлгән.
Транспорт чарагызны алып китмәсеннәр, салоннан әйберләрне чәлдермәсеннәр өчен үзегез дә саклык чаралары күрегез: машина ишекләрен ачык калдырмагыз, ачкычны да үзегез белән ала торган булыгыз; озак вакытка туктаганда караңгы һәм кеше аз йөри торган урыннарны сайламагыз; угры тиз генә кабызып китә алмасын өчен төрле каршылыкларны файдаланыгыз (сигнализация, рульне, педальләрне блокировкалау һ.б.); документларны, кыйммәтле әйберләрегезне машинада калдырып йөрмәгез; кеше кулыннан сатып алганда, машинаның паспортын (ПТС) сорагыз, урлангандыр дигән шик туа икән, 02 телефоны аша полициягә хәбәр итегез. Никадәр тизрәк хәбәр итсәгез, җинаять тә шулкадәр тизрәк ачылыр.
