Иваново өлкәсендә татар милли көрәшен популярлаштырырга булганнар. 10 ноябрь көнне Иваново шәһәрендә татарның милли спорт көрәше өчен яңа спорт залы ачылган.
Әлеге көрәш залы Иваново урта белем бирү мәктәпләренең берсендә урнашкан. Шунысын да билгеләп үтү кирәк, бу мәктәптә 21 милләт балалары белем ала. "Спорт мәйданының төп максаты - шәһәрдә милли спорт төрләрен популярлаштыру, төрле милләт вәкилләре арасында дустанә мөнәсәбәтләрне тагын да ныгыту, аларны бер-берләренең мәдәниятләре, гореф-гадәтләре белән якыннанрак таныштыру булачак", - дип белдерә оештыручылар.
Татар-башкорт спорт көрәше залын ачу тантанасында өлкә татарларының милли-мәдәни автономиясе, Иваново өлкәсенең милли көрәш федерациясе вәкилләре, өлкә җитәкчеләре һәм башкалар катнашкан. Концерт программасы тәмамлану белән мәктәп укучылары арасында көрәш ярышлары башланып киткән. Ивановода бу спорт төре бик популяр икән. Әлеге тәүге бәйгедә 100дән артык укучы чыгыш ясавын исәпкә алсак, моның шулай булуына шик юк.
Тагын бер нәрсәне билгеләп үтәргә кирәк, тамашачылар көрәш ярышлары белән генә хозурланып калмаган - аларга махсус концерт программасы да тәкъдим ителгән. Шул рәвешле, Иваново өлкәсе халкын татар җыр-биюләре белән таныштыру мөмкинлеге дә туган.
Интертат.ру газетасыннан.
Редакциядән. Менә сиңа мә! Без Татарстанда яшәп тә, үзебезнең шәһәрдә милли көрәш мәктәбен булдыра алмыйбыз, ә илебезнең төрле төбәкләрендә гөрләтеп спорт заллары да ачалар, төрле турнирлар да үткәрәләр икән. Безнең тиешле түрәләр исә тегесе юк, монысы юк, фәлән елда туган балалар юк (!) дигән мантыйксыз җаваплар бирүдән ары китә алмыйлар. Аларга Ивановога барып, милли көрәш мәктәбен ничек булдыру тәҗрибәсе белән танышып кайтырга тәкъдим итәбез. Бәлки, файдасы тияр.
