"Бөгелмә авазы" газетасының узган елдагы 19 декабрь санында шундый баш астында мәкалә басылып чыккан иде.
Исегезгә төшерәбез: хатның авторы Чәчкә ханым Садыйкова үзенең әнисе Хәдичә әбинең (аңа 1 гыйнварда 95 яшь тулды), Бөек Ватан сугышы ветеранының тол җәмәгате буларак, торак шартларын яхшыртуга тулы хокукы булып та, документлар әзерләп, берничә ел йөрсәләр дә, бүгенгә кадәр рәсми җавап ала алмаулары турында ачынып язган иде. "Кадак кагарга да ярдәмчесе булмаган 100 яшен ваклаучы әби кышны ничек чыгар соң? Әнине бүгенге көндә минем кызым - аның оныгы карый, тик ул үзе дә шикәр чире белән авырый. Ә әнинең йорты үзе белән бергә картайган, нигезләре җимерелгән, яңгырлар чорында түбәдән су үтә…" - дип, чаң суга ул.
Бу хат газетада басылып чыгу белән җирле башкарма комитетка җибәрелде. Редакциягә килгән рәсми җаваптан күренгәнчә, аларга язма 18 гыйнварда гына барып ирешкән. "Шәһәр тибындагы Карабаш поселогы" муниципаль берәмлеге башкарма комитеты Бөгелмә муниципаль районы башкарма комитеты җитәкчесе Татьяна Никулинага бу уңайдан түбәндәгеләрне хәбәр итә:
"Хәдичә Хәмидулла кызы Садыйкова Бөек Ватан сугышы ветераны-ның тол хатыны булып санала һәм 2012 елның мартыннан башкарма комитет каршында торак шартларын яхшыртуга мохтаҗлар исемлегендә тора. Х. Садыйкова, Бөек Ватан сугышы ветеранының тол хатыны буларак, республикакүләм субсидия алучылар реестрына кертелгән. Күрсәтелгән категория субсидияне бирү белән, исемлеккә кертелгән көннән алып, чират нигезендә, Татарстан Республикасының Хезмәт, мәшгульлек һәм халыкны социаль яклау министрлыгы шөгыльләнә. РФ бюджетыннан акчалар килү белән бу турыда Хәдичә Садыйковага уведомление тапшырылачак.
Бүгенге көндә 2010 - 2011 елларда шушы категориягә кертелеп, исәпкә бастырылган ветераннарга акча средстволары бүленеп бирелүе турында хәбәрләр җибәрелде.
Антон МИХАЙЛОВ,
"Шәһәр тибындагы Карабаш поселогы" муниципаль берәмлеге башлыгы.
