7 июнь Халыкара тимер юлны аркылы чыкканда куркынычсызлык көне дип игълан ителде. Евросоюз һәм БМОның Европа икътисади комиссияләре һәм Халыкара тимер юллар берлегенең уртак карары тимер юлларны аркылы чыгу юлларындагы (гади генә әйткәндә, переездлардагы) проблемаларга игътибарны җәлеп итү максатыннан чыкты.
Әлфинур ШӘВӘЛИЕВА әзерләде.
Тимер юллар - гаять куркыныч урын, моны транспорт йөртүчеләр яхшы белергә тиеш. 2011 елда гына да Россиядә тимер юлларны аркылы чыгу урыннарында 228 юл һәлакәте теркәлгән. Аларда 49 кешенең гомере өзелгән, 191 кеше имгәнгән, тән җәрәхәтләре алган.
Татарстан территориясендә 220дән артык переезд бар. Узган 2011 елда 2 тапкыр хәрәкәттәге составның машина таптату очрагы теркәлде, анда өч кеше зыян күрде.
Агымдагы елның биш аенда инде 4 вакыйга булып, анда бер кеше һәлак булды, өч кешенең сәламәтлегенә зыян килде. Афәтнең төп сәбәпчесе - барлык очракларда да транспорт йөртүчеләр.
Дәүләт автоинспекциясе исегезгә төшерә: тимер юлны аркылы чыкканда юл кагыйдәләрен бозган өчен РФ Административ хокук бозулар кодексының 12.10 нчы маддәсе нигезендә җавап тотарга туры киләчәк. Юлны перезддан башка урында кисеп чыгу, шлагбаум ябылып килгәндә, яисә тулысынча ябык булганда аркылы чыгу, светофорның кисәтүле сигналын игътибарга алмыйча үтеп китү, рельслар өстендә туктап калу - боларның һәммәсе өчен дә 500 сум күләмендә штраф, яисә 3 айдан 6 айга кадәр транспорт чарасы белән идарә итү хокукыннан мәхрүм итү каралган. Ә инде шушы ук хәл тагын кабатланса, кеше 1 ел рульгә утыра алмаячак.
2011 елда тимер юлларны аркылы чыгу урыннарында тәртип бозган өчен мең ярымнан артык кеше җавапка тартылган булса, быел андыйлар саны 200дән артык. ТР Эчке эшләр министрлыгы дәүләт автоинс-пекциясе сезне тимер юллар белән автомобиль юллары кисешкән урыннарда бигрәк тә уяу һәм игътибарлы булырга чакыра. Үзегезнең, якыннарыгызның гомерен, сәламәтлеген куркыныч астына куймагыз!
Иң мөһим һәм кызыклы язмаларны Татмедиа Telegram-каналында укыгыз
