Менә сиңа балык – ярый агуланмаса халык!
9 июль көнне, бөтен шартын җиренә җиткереп, скумбрия балыгын үзем тозлап кую нияте белән, үзебездән ерак булмаган, 8 нче мәктәп янындагы "Зелёная Роща" кибетенә балык алырга киттем.
Әнәс НАЗЫЙМОВ,
Бөгелмә шәһәре.
Барып җитүгә карыйм, капчык саен өчәр-өчәрне генә салып, нык кына туңдырылган балыклар өеп куелган.
- Кызым, скумбриягез свежиймы? Берничә кат эретеп туңдырылганы түгелме икән? - дип сорадым сатучыдан.
- Бабай, кичә генә китерделәр, менә дигән балык, - дип җавап бирде сатучы.
Шулай мактап та куйгач, 6 балык үлчәттем, барысы 250 сумлык булды. Элек-электән, тозын да таман гына салып, тәмләткечләр белән үзем тозлап куя торган идем.
Бу юлы да шундый хыял белән ашыгып-ашыгып өйгә кайттым. Кайтуга, балыкны эшкәртә дә башладым. Беренче балыгымның башын кисеп, эчен алуга, ите таралып, кабыргалары тырпаеп килеп чыкмасынмы! Карасам, ите боткага әйләнгән, черек балык икән, ләбаса. Икенче балыкны алдым, башын кис-
тем, эчен алдым - тагын шул ук хәл. Юк инде, күрәләтә торып, черек балык ашап, агуланыр хәл юк дип, киттем балыкларымны күтәреп кабат кибеткә.
Әле генә мактап җибәргән сатучы кыз, балыкларга күз генә төшереп алды да:
- Безгә базадан китерәләр, мин нишләтим инде?! - дип куйды. Аннары 250 сум урынына 229 сум акчаны кайтарып бирде. 21 сумы кисеп ташланган башы, эче өчен булды инде. Кемдер гаебе белән хәләл акчам әрәм булды дип, ваксынып-нитеп тормадым, ярый инде, минәйтәм, агуланып чирләп китсәң, үлмәсәң дә, хакы бишләтә чыккан булыр иде әле.
Шулай да сорау туды: Бөгелмәдә кибетләрдәге азык-төлекнең сыйфаты өчен җаваплы оешма, хуҗа бар микән? Әгәр бар икән, акча эшләү максаты белән генә комсызланучылар аркасында бозылган, яисә сату срогы чыккан азык-төлек сатылуга юл куймасын иде ул.
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84
