Барыбызга таяныч, һәммәбезгә үрнәк ул

Газиз дин кардәшләрем, әссәламегаләйкүм үә рәхмәтуллаһи үә бәрәкәтүһү.

Безнең Иркен авылында "Мәнзүмә" мәчетенең ишекләре бар халык өчен дә һәрвакыт ачык. Мәчетебезнең имам-хатыйбы Әхәт Госман улы Госманов озак еллар - 1993 елдан бирле Иркен авылында имамлык хезмәтен башкара. Вазифалары күп булуга да карамастан, өлкән яшьтә (аңа 82 яшь) булса да, Аллаһка шөкер, бөтенесенә дә өлгерә. Мәчетне дә, зиратны да тәртиптә тоту өчен күп көч куя авылыбыз имамы. Һәр атна саен җомга намазы укыла. Якыннарыбызны соңгы юлга озату эшен дә җиренә җиткереп башкара Әхәт абый. Коръән ашлары, корбан чалулар, өмәләрне, өлкәннәр бәйрәмен уздыруда да ул башлап, оештырып йөри.
Әхәт абый үз гомерен гадел, ихтирам казанып яшәде. Тату гаилә башлыгы да булды. Гомер юлдашы вафат булса да, ул ялгыз түгел, гел халык белән тыгыз элемтәдә. Һәрвакыт балалары, оныклары кайтып тора. Тәртипле, итагатьле балалар үстерделәр алар җәмәгате белән. Оныклары да үзен бик ярата. Инде оныкчыклары да бар. Лаеклы ялга ул, ихтирам казанып, нефтьчеләр сафыннан китте. Һәрбер бәйрәмгә чакыралар аны.
Менә Ураза гаете дә килеп җитте. Шул уңайдан Әхәт абыйны, авыл кешеләрен, милләттәшләребезне Ураза бәйрәме белән котлыйм.
Шулай ук мәдәният йортында авылыбызның мөгаллимәсе Фәридә Өлфәт кызы Халитова авыл яшьләре өчен гарәп телен өйрәнү түгәрәген алып бара. Шунда ук матур, гыйбрәтле вәгазьләр дә укыла. Гомумән, дәресләр бик тә эчтәлекле үткәрелә, заманча техника (компьютер) кулланып, яшьләр догалар өйрәнә. Теләкләре булганнар, барыгыз да укуларга килә аласыз.
Наилә МАМАКОВА.
Лениногорск шәһәре.