Алыргамы, алмаскамы?
Федераль ташламаларга ия булган һәр кеше 1 октябрьгә кадәр үзе өчен бер сорауга ачыклык кертергә тиеш: 2013 елда социаль хезмәтләр тупланмасыннан (телдә "соцпакет" дип йөртелә) файдаланачакмы, әллә аннан баш тартып, акчалата компенсация генә алачакмы?
Бер нияткә килгән, 2013 елда да шул юлны сайлаган кешегә Пенсия фондына мөрәҗәгать итеп торуның хаҗәте юк. Ә инде кеше фикерен үзгәрткән икән,
1 октябрьгә кадәр яшәү урынындагы Пенсия фондына барып, яңа гариза язарга тиеш.
Социаль тупланмалар бәясе ел саен индексацияләнеп тора. 2012 елның 1 апреленнән ул 795 сум 88 тиен тәшкил итә. Шуның 613 сумы - даруларга, 94 сум 83 тиене - шифаханәләрдә дәвалануга, 88 сум 05 тиене юл чыгымнарына туры килә. Боларның һәрбер өлешен кеше натуралата да, акчалата да алырга хокуклы.
Шунысына аерым игътибар итегез, табиб язып биргән дарулар бәясенең гражданнарга бирелә торган соцпакет бәясеннән күпкә артып китүе ихтимал. Социаль хезмәтләр тупланмасына хокукы булган кеше аннан баш тартып, акчалата компенсация алырга да хокуклы. Андыйларга, билгеле, табиб рецепты буенча түләүсез дарулар бирү каралмаган.
Кешенең хроник чирләре азмаган чакта, хәле борчылырлык булмаганда, натуралата ташламаларны акчага алыштырырга теләве аңлашыла, әлбәттә. Тик менә чир көчәеп, озакка сузылган дәвалану таләп ителә, күптөрле дарулар кирәк була башласа, ул компенсация акчасының гына җитмәве көн кебек ачык. Еш кына гаилә бюджетында андый акча табылмый да.
Шуңа күрә дә соцпакеттан баш тартканчы, башта ныклап уйлагыз: акча алу отышлырак булырмы, әллә хезмәтләрдән файдаланумы? Акча аласыз икән, социаль хезмәтләр тупланмасын, Пенсия фондына гариза язып, 1 октябрьдән генә яңарту мөмкин булачак. Шуннан соң бер ел дәвамында сез үзегезнең карарны үзгәртә алмыйсыз (Россия законнарында бу каралмаган).
Ә инде 2012 елда даруларны бушлай алу хокукыннан файдаланган кешегә Пенсия фондына кабат гариза язып торуның хаҗәте юк.
Иң мөһим һәм кызыклы язмаларны Татмедиа Telegram-каналында укыгыз
